Ellen Ýr hefur lokið keppni

Ellen Ýr Jónsdóttir keppti í dag á HM í klassískum kraftlyftingum sem fer fram í Calgary, Kanada. Hún keppti í -84kg flokki og er þetta hennar fyrsta alþjóðamót á stuttum en mjög öflugum kraftlyftingaferli. Hún lyfti 167,5kg í hnébeygjunni. Í bekkpressunni lyfti hún 87,5kg og reyndi svo tvisvar við 92,5kg sem gekk því miður ekki. Hún lokaði svo keppnisdeginum á 165kg réttstöðulyftu. Þetta gaf henni 420kg í samanlögðu og fyrsta alþjóðamótið komið á blað.

Ellen með 167,5kg á bakinu. Ekkert gefið eftir!

Á morgun keppir svo fyrsti karlinn fyrir Íslands hönd á HM í klassískum kraftlyftingum og jafnframt á síðasta keppnisdeginum. Það er hann Júlían JK Jóhannsson sem er flestum vel kunnur. Hann keppir venjulega í hefðbundnum kraftlyftingum en ákvað að slá til og mæta á kjötinu. Hægt verður fylgjast með honum í beinni hér kl. 20:00 á íslenskum tíma. Kraftlyftingasamband Íslands óskar honum góðs gengis.

Arnhildur hefur lokið keppni

Arnhildur Anna Árnadóttir keppti í dag á HM í klassískum kraftlyftingum sem fer fram í Calgary, Kanada. Hún keppir í -72kg flokki og hefur hún verið að keppa í kraftlyftingum síðan 2012. Hún hefur tekið þátt á nokkrum alþjóðamótum og því þaulvanur keppandi. Því miður voru enga bætingar í dag en hún var þó ekki langt frá sínum besta árangri heldur. Í hnébeygjunni lyfti hún 152,5kg. Í bekkpressunni lyfti hún 80kg og svo lokaði hún deginum á 160kg réttstöðulyftu. Þetta gaf henni 392,5kg í samanlögðu.

Mynd úr safni. Arnhildur að dedda þungt!

Á morgun keppir svo Ellen Ýr Jónsdóttir í -84kg flokknum. Hún hefur keppni klukkan 19:00 á íslenskum tíma og verður hægt að fylgjast með henni í beinni útsendingu hér. Kraft óskar henni góðs gengis og hvetur sem flesta til þess að horfa á hana lyfta.

Ragnheiður með nýtt íslandsmet

Ragnheiður Kr. Sigurðardóttir keppti í dag á HM í klassískum kraftlyftingum sem er haldið í Calgary, Kanada. Ragnheiður keppir í -57kg flokki og eins og alltaf þá var stefnan sett á bætingar. Hún lyfti 127,5kg í hnébeygjunni og bætti þar með íslandsmetið sitt. Í bekkpressunni lyfti hún 80kg en meiddist í baki við þá lyftu. Hún ákvað að reyna við 82,5kg en það var ekki inni í dag. Hún lækkaði því aðeins opnunarlyftuna í réttstöðulyftunni en endaði á því að lyfta 150kg sem er ekki langt frá hennar besta. Hún lauk því mótinu með 357,5kg í samanlögðu.

Kraftlyftingasamband Íslands óskar henni til hamingju með árangurinn!

Ragnheiður Kr með nýtt íslandsmet!

Á morgun keppir svo Arnhildur Anna Árnadóttir í -72kg flokknum. Hún hefur keppni klukkan 19:00 á íslenskum tíma og verður hægt að fylgjast með henni í beinni útsendingu hér. Kraft óskar henni góðs gengis og hvetur sem flesta til þess að horfa á hana lyfta.

Matthildur með brons

Matthildur Óskarsdóttir keppti í dag á HM í klassískum kraftlyftingum sem fer fram í Calgary, Kanada. Matthildur hefur þrátt fyrir ungan aldur verið að keppa í kraftlyftingum síðan 2014 en þetta er í fyrsta skiptið sem hún keppir í unglingaflokki á alþjóðamóti. Matthildur keppir í -72kg flokki. Hún mætti sterk til leiks og lyfti 140kg í hnébeygjunni sem er nýtt íslands með í unglingaflokki. Í bekkpressunni lá því best við að bæta líka íslandsmet og lyfti hún 95kg sem gaf henni bronsið í bekkpressunni. Þetta var því miður ekki hennar dagur í réttstöðulyftunni. 142,5kg fóru upp en gripið brást í seinni lyftum. Þetta gaf henni 377,5kg í samanlögðu sem er jöfnun á hennar besta árangri. 2 íslandsmet og mun Matthildur án vafa taka þau fleiri í framtíðinni, þetta er rétt að byrja.

Kraftlyftingasamband Íslands óskar henni innilega til hamingju með árangurinn!

Matthildur með brons um háls og bros á vör!

Næsti íslenski keppandinn sem lyftir á HM er Ragnheiður Kr. Sigurðardóttir og keppir hún á fimmtudaginn klukkan 15:00 á íslenskum tíma. Ragnheiður er með hæstu wilks stig  sem íslensk kona hefur tekið í klassískum kraftlyftingum og því verður gaman að fylgjast með henni. KRAFT óskar henni góðs gengis á mótinu og hvetur sem flesta til að horfa á.

Bein útsending verður eins og áður hér!

Ragna Kristín með íslandsmet

Ragna Kristín Guðbrandsdóttir keppti í dag á HM í klassískum kraftlyftingum sem fer fram í Calgary, Kanada. Hún keppti í -63kg flokki stúlkna og var stefnan sett á bætingar. Hún lyfti 125kg í hnébeygjunni. Hún var í hörkubaráttu við 130kg lyftu þegar stangarmenn gripu óvart inní. Hún fékk þá annað tækifæri til þess að lyfta 130kg en því miður var brunnurinn tæmdur í fyrri lyftuna. Í bekkpressunni lyfti hún 65kg sem er jöfnun á hennar besta árangri. Hún fór svo alla leið í réttstöðulyftunni og lauk mótinu á 130kg lyftu sem er nýtt íslandsmet í stúlknaflokki. Þetta gaf henni 320kg í samanlögðu og nýtt íslandsmet í samanlögðu. 3 íslandsmet, ekki amarlegur dagur það.

Kraftlyftingasamband Íslands óskar henni til hamingju með árangurinn!

Ragna með 130kg réttstöðulyftu. Léttvigt í hennar höndum.

Á morgun lyftir svo Matthildur Óskarsdóttir. Hún keppir í -72kg unglinga og hefur hún keppni klukkan 15:00 á íslenskum tíma. Hægt verður að fylgjast með í beinni útsendingu hér. Kraftlyftingasambandið óskar henni auðvitað góðs gengis á morgun. Mælum við að sem flestir horfi á útsendinguna og hvetji hana heima í stofu.

ÍM unglinga og öldunga í kraftlyftingum og bekkpressu – Úrslit

Íslandsmót unglinga og öldunga í kraftlyftingum og bekkpressu voru haldin um helgina á Akranesi. Það var mikill andi í þeim sem mættu og lyftu.

Kraftlyftingar

Í kvennaflokki -57kg masters I mætti María Guðsteinsdóttir úr Ármanni  sterk til leiks. Hún lyfti 137,5kg í hnébeygju sem er nýtt íslandsmet í masters I flokki. Í bekkpressunni lyfti hún 77,5kg sem er einnig nýtt íslandsmet í masters I flokki. Hún endaði svo daginn á því að lyfta 168,5kg í réttstöðulyftunni sem er nýtt íslandsmet í opnum flokki. Þetta gaf henni samanlagt 383,5kg sem er nýtt íslandsmet í masters I og 445 wilks stig.

Í karlaflokki vann Guðfinnur Snær Magnússon úr Breiðabliki. Guðfinnur er alltaf hungraður í bætingar og mætti í anda eins og alltaf. Hann lyfti 350kg í hnébeygjunni. Kláraði bekkpressuna í 250kg og togaði svo 275kg upp í réttstöðulyftunni. Þetta gaf honum 875kg í samanlögðu og 486,3 wilks stig.

Bekkpressa

Í bekkpressunni mætti Svavar Örn Sigurðsson til leiks og lyfti þar 155kg. Hann besta bekkpressa til þessa og því um persónulegar bætingar að ræða.

Full úrslit úr mótunum má sjá hér:

KRAFT ÍM unglinga og öldunga í kraftlyftingum

KRAFT ÍM unglinga og öldunga í bekkpressu

Laufey með ný íslandsmet

Laufey Agnarsdóttir keppti í dag á HM í klassískum kraftlyftingum sem fer fram í Calgary, Kanada. Laufey keppir í -84kg flokki masters I. Laufey gekk vel í dag og kláraði á sínum besta árangri til þessa. Í hnébeygjunni lyfti hún 137,5kg sem er jöfnun á hennar besta. Í bekkpressunni lyfti hún 95kg sem er nýtt íslandsmet í hennar flokki. Í réttstöðulyftunni lyfti hún svo 160kg sem er einnig nýtt íslandsmet. Þetta gaf henni 392,5kg í samanlögðu sem er einnig nýtt íslandsmet. 3 íslandsmet í heildina. Hún lauk keppni í 5 sæti og var með 8 lyftur gildar af 9. Flottur árangur hjá Laufey.

Kraftlyftingasamband Íslands óskar henni til hamingju með árangurinn!

Mynd úr safni Kraft. Rósa Birgisdóttir t.v. og Laufey Agnarsdóttir t.h.

Við hvetjum svo lesendur að fylgjast áfram með. Ragna Kristín Guðbrandsdóttir mun keppa á mánudaginn næstkomandi en hún keppir í -63kg stúlknaflokki. Hún hefur keppni klukkan 14 á íslenskum tíma.  Óskar Kraftlyftingasambandið henni góðs gengis og minnir á að hægt er að fylgjast með í beinni útsendingu hér og mun hún keppa á palli 2.

Sigþrúður með bronsverðlaun

Sigþrúður Erla Arnarsdóttir keppti í gær á HM í klassískum kraftlyftingum sem er haldið í Calgary, Kanada. Hún keppti í +84kg flokki kvenna masters 2. Í hnébeygjunni lyfti 165kg í þriðju lyftu sem er evrópumet í hennar flokki og bronsverðlaun í greininni. Í bekkpressunni þá lyfti hún 92,5kg sem er einnig evrópumet í masters 2 og líka bronsverðlaun. Svo lauk hún þriðju réttstöðulyftunni á því að lyfta 177,5 sem gaf henni þriðju bronsverðlaunin. Þetta gaf henni 435kg í samanlögðu sem er nýtt evrópumet og fjórða bronspeninginn. Sigþrúður var með níu gildar lyftur af níu lyftum og þriðja sætið í heildina sem er stórglæsilegur árangur. Hún setti því þrjú evrópumet og fékk bronsverðlaun í öllum greinum og samanlögðu.

Kraftlyftingasamband Íslands óskar henni innilega til hamingju með árangurinn og bronsið!

Sigþrúður upp á verðlaunapalli, að sjálfsögðu með íslenska fánann.

 

Á laugardaginn mun svo Laufey Agnarsdóttir keppa í -84kg flokki master I. Hún mun hefja keppni klukkan 15:00 á íslenskum tíma og verður hægt að horfa á það í beinni útsendingu hér!

Sigþrúður keppir í dag

Heimsmeistaramótið í klassískum kraftlyftingum hefst í dag í Calgary, Kanada. Fyrir hönd íslands á mótinu keppa 8 keppendur, 7 konur og 1 karl.

Fyrsti íslenski keppandinn keppir í dag en það er hún Sigþrúður Erla Arnarsdóttir sem keppir í +84kg flokki kvenna M2. Hún kom heim með gullpening um hálsinn af síðasta EM og því spennandi að sjá hvernig henni gengur í dag.

Hennar flokkur hefur keppni klukkan 18:00 á staðartíma í Calgary en það er á miðnætti hér á Íslandi. Gangi þér vel Sigþrúður!

Hægt verður að fylgjast með mótinu hér!

Viktor og Júlían með gull á EM

Síðasti keppnisdagurinn á EM í kraftlyftingum í Pilsen, Tékklandi var í dag. Tveir íslendingar mættu til keppni. Það voru þeir Viktor Samúelsson og Júlían JK Jóhannsson sem mættu í góðum anda og í hrikalegu keppnisskapi.

Viktor var fyrstur á pallinn í hnébeygjunni og lyfti hann þar 380kg þar sem er hans þyngsta hnébeygja á alþjóðamóti. Næst var það bekkpressan og var ljóst þar að hann yrði ofarlega enda hefur hann verið með hæstu wilks stig í bekk í síðastliðin ár. Hann gerði sér því lítið fyrir og lyfti 307,5kg sem dugði honum til gullverðlauna í bekkpressu. Frábær árangur. Réttstaðan gekk einnig mjög vel og lyfti hann þar 322,5kg sem er hans besta lyfta alþjóðlega. Samanlagt endaði hann mótið í 4 sæti í heildina með 1010kg í samanlögðu sem er besti árangur sem hann hefur náð á alþjóðlegu móti.

Innilega til hamingju með árangurinn Viktor!

Viktor að toga hrikalega! /Mynd frá IPF

Þegar -120kg flokkurinn kláraði hnébeygjurnar var komið að seinna hollinu sem var +120kg flokkurinn. Júlían opnaði í 400kg hnéybeygju en því miður tókst honum ekki að fá gilda hnébeygju. Hann reyndi þrisvar við 400kg sem því miður gekk ekki og datt hann þar með út úr keppninni í samanlögðu. En hann lét það ekki á sig fá og mætti tvíefldur í bekkinn. Hann lyfti í bekkpressunni 312,5kg sem er persónulegt met. Svo var komið að réttstöðulyftunni en hann er núverandi heimsmeistari í réttstöðulyftu í +120kg og var því ljóst að hann var líklegur til stórræða þar. Júlían lokaði þar keppninni á 400kg réttstöðulyftu. Hans besta lyfta þar og einnig óopinbert heimsmet! En því miður þar sem hann náði ekki gildri lyftu í hnébeygjunni er það óopinbert. Þetta gaf honum þó gullið í réttstöðu og því fengu íslendingar í dag 2 gullverðlaun.

Innilega til hamingju með árangurinn Júlían!

Júlían með 400kg í höndunum!

Myndband af lyftunni má sjá inn á facebook síðu evrópska kraftlyftingasambandsins:

MYNDBAND AF 400KG LYFTU JÚLÍANS

 

Íslenski hópurinn á EM. F.v. Daníel Geir Einarsson, Guðfinnur Snær Magnússon, Júlían JK Jóhannsson, Viktor Samúelsson, Hulda B Waage, Grétar Skúli Gunnarsson og Auðunn Jónsson