Tvö kraftlyftingamót verða haldin á Akureyri helgina 14. og 15. júlí, Sunnumótið og Akureyrarmótið í kraftlyftingum.
Sunnumótið er kvennamót og keppt er í bekkpressu og réttstöðulyftu án búnaðar. Akureyrarmótið er hefðbundið opið kraftlyftingamót.
Nánari upplýsingar á heimasíðu mótshaldara, Kraftlyftingafélags Akureyrar.
Kraftlyftingadeild Breiðabliks og Heiðrún, kraftlyftingafélag Garðabæjar héldu sameiginlegt bekkpressumót í Garðabæ í dag.
15 keppendur luku keppni, þar af 5 konur. Tveir keppendur í -93,0 flokki karla lyftu í búnaði.
Veitt voru verðlaun í öllum flokkum og stigabikar karla og kvenna. Sterkasta konan var Hafdís Huld Sigurðardóttir, Grótta, sem lyfti 55 kg í -52,0 kg flokki, rúmlega eigin líkamsþyngd “á kjötinu”. Stigabikar karla í búnaði fékk Kristján S. Níelsson, Breiðablik, með vel útfærð 172,5 kg í -93,0 kg flokki. Stigabikar karla án búnaðar hlaut heimamaðurinn Erling Gauti Jónsson, sem lyfti 130 kg í -83,0 kg flokki.
Heildarúrslit: ÁN BÚNAÐAR - MEÐ BÚNAÐI
Dómarar voru Auðunn Jónsson, Fannar Dagbjartsson og Alexander Ingi Olsen. Mótsstjóri var Halldór Eyþórsson. Ritarar Hulda Waage og Ingimundur Ingimundarson.
Þetta var fyrsta kraftlyftingamót sumra, bæði keppenda, starfsmanna og áhorfenda og bar mótið þess eðlilega nokkur merki, en allir kláruðu sín verkefni og áhorfendur skemmtu sér vel.
Fyrsta mót er alltaf til að læra af. Keppendur fara heim með ný verkefni, en margir þeirra eiga mörg kíló inni með bættri tækni og láta vonandi ekki hér staðar numið heldur halda áfram að bæta sig.
Mótshaldarar komu vel frá sínu og geta önnur minni félög tekið Heiðrúnarmenn til fyrirmyndar í því að sníða sér stakk eftir vexti, byrja á að setja upp lítið og einfalt mót, læra af því og bæta í næst. Blikar og Heiðrún sýna hér og sanna að tvö félög geta vel unnið saman, en það er líka áhugaverður möguleiki fyrir félög sem hafa ekki mannskap til að sjá um alla framkvæmd sjálf.
Laugardaginn 23.júni nk verður haldið bekkpressumót í íþróttamiðstöðinni Ásgarði í Garðabæ. Mótið hefst kl. 12.00 og er aðgangur ókeypis.
Keppt verður bæði með og án búnaðar og hér má sjá keppendalista: án búnaðar – í búnaði.
Alls eru skráðir 20 keppendur frá 8 félögum, bæði byrjendur og afreksmenn. Meðal þeirra er Jóhanna Þórarinsdóttir sem keppir í -72,0 flokki kvenna. Hún keppir næst á EM í bekkpressu í ágúst og verður þetta mót mikilvægt tækifæri fyrir hana til að taka stöðuna í sínum undirbúningi fyrir það.
Tveir keppendur eru skráðir frá hinni nýstofnuðu kraftlyftingadeild UMF Snæfells í Stykkishólmi, en það er ánægjulegt að sjá að sífellt fleiri bætast í hópinn.
Mótshaldarar eru kraftlyftingadeild Breiðabliks og Heiðrún, kraftlyftingafélag Garðabæjar. Þeir hafa sameinað krafta sína, en þetta er í fyrsta sinn sem Heiðrúnarmenn bjóða til leiks í nýju aðstöðunni sinni í Garðabæ.
Við hvetjum alla áhugamenn um bekkpressu að leggja leið sína þangað á laugardaginn kl. 12.00 á stutt og skemmtilegt Jónsmessumót.
Keppendur kynni sér vel reglur um klæðnað og búnað. Vigtun er kl. 10.00.
Kraftlyftingasamband Íslands óskar félögum sínum og landsmönnum öllum gleðilegrar þjóðhátíðar.
Njótið dagsins.
Eftir nákvæmlega viku fjölmennum við í Garðabæinn þar sem Heiðrúnarmenn halda sitt fyrsta bekkpressumót í samvinnu við Breiðablik.
Keppendum er bent á að stíga á vigtina áður en þeir panta þjóðhátíðarísinn 
ÍSÍ býður upp á almenna hluta náms til Þjálfara 1 í sumar, en það er nauðsynlegur undanfari sérgreinahlutans sem verður í boði í haust. Um er að ræða fjarnám fjarnám og skráningarfrestur er til 14.júni. Upplýsingar hjá vidar@isi.is
Þeir sem hafa lokið Þjálfara 1 námi geta bætt við sig, en fjarnám fyrir Þjálfara 2 verður í boði hjá ÍSÍ í sumar líka og er skráningarfrestur til 21.júni.
Á morgun hefst í Svíþjóð keppni á fyrsta heimsbikarmóti IPF í kraftlyftingum án útbúnaðar. 170 keppendur eru skráðir til leiks, 110 karlar og 60 konur. Heimasíða mótsins: https://sites.google.com/site/worldcupstockholm/
Live streaming verður á netinu: http://styrkelyft.qrodo.tv/
Mikil umræða hefur lengi átt sér stað í kraftlyftingaheiminum um ágæti þess að nota sérútbúnað í keppni og sýnist sitt hverjum. Öfgafyllstu útgáfurnar af bekkpressusloppum hafa hleypt vatni á myllu þeirra sem telja slíkar græjur skaðlegar bæði fyrir keppendur og ímynd íþróttarinnar og vilja helst bara keppa “á kjötinu”. Á meðan finnst öðrum útbúnaðurinn sjálfsagður og rétt beiting hans vera mikilvægur liður í keppninni.
IPF hefur ákveðið að koma til móts við þá sem vilja keppa RAW með því að halda nú í fyrsta sinn heimsbikarmót án útbúnaðar og nefna það Classic Powerlifting. Sérstakur stuðningsaðili mótsins er Eleiko. Sérstakar reglur um leyfilegan fatnað hafa verið birtar og lágmarksviðmið um heimsmet hafa verið sett.
það verður gaman að fylgjast með árangur manna á þessu móti og hvernig framhaldið verður í umræðunni um að vera eða ekki vera í búnaði.
Stjórn KRAFT lagði fram tillögu að afreksstefnu sambandsins á fundi með formönnum félaga 21.maí sl.
Á fundinum voru framtíðarmarkmið og stefnumál sambandsins rædd og ymislegt lagfært í tillögum stjórnar.
Afreksstefnan hefur nú verið birt undir AFREKSMÁL og verður unnið samkvæmt þessum markmiðum á næstu árum.
Til að stefnan nái fram að ganga þurfa allir að leggjast á eitt, hver á sínum stað. Stjórn sambandsins í sínum störfum, stjórnir félaganna á sínum vettvangi og fyrst og fremst iðkendur íþróttarinnar sem æfa og leggja mikið á sig á hverjum degi. Gott samstarf byggt á gangkvæmri virðingu og skilningi er grunnurinn sem við viljum leggja.
Skráningu er lokið á bekkpressumótið í Garðabæ 23.júni nk.
20 keppendur eru skráðir til leiks 8 konur og 12 karlar. Flestir ætla að keppa án búnaðar. KEPPENDALISTAR
Nánari upplýsingar um mótið munu birtast innan tíðar. Við bendum keppendum, sem sumir eru að keppa í fyrsta sinn, á að kynna sér vel allar keppnisreglur og reglur um leyfilegan klæðnað.
Júlían J.K. Jóhannsson keppti í dag á EM unglinga. Júlían vigtaði 142,8 kg í flokki 120,0 +. Hann keppir nú í fyrsta sinn í aldursflokknum 19 – 23 ára og var yngstur í hópnum.
Júlían lyfti seríuna 320-235- 327,5 = 882,5 kg og endaði í 4. sæti. Sigurvegari í flokknum var rússinn Igor Filipov með 965 kg
Hnébeygjan gekk ekki sem skyldi hjá Júlían í þetta skiptið. Hann kláraði opnunarþyngdinni 320,0 kg létt en mistókst tvisvar með tilraun við nýtt íslandsmet 335,0 kg. Það var auðsætt alla leið frá Danmörku að styrkurinn var til staðar, en tæknileg útfærsla var ekki nægilega góð að mati dómara. Júlían hefur mikið að sækja í bættri beygjutækni.
Á bekknum byrjaði Júlían örugglega á 220 kg. Hann setti nýtt íslandsmet í annari tilraun með 230 kg, skítlétt eins og þjálfarinn kallaði til hans, og bætti um betur í þeirri þriðju með 235,0 kg. Nýtt íslandsmet unglinga og persónuleg bæting um 7,5 kg var í höfn og nokkuð óvænt 4.sætið í bekkpressu.
Réttstaðan hefur lengst af verið besta grein Júlíans, en hann varð heimsmeistari drengja í greininni í fyrra og sýndi í dag að það var engin tilviljun. Hann opnaði létt á 290 kg og hristi svo upp í keppinautum sínum með 315,0 kg í annarri. Míkið taugastríð upphófst nú í réttstöðukeppninni með taktískar meldingar á víxl. Íslenska liðið hélt haus og Júlían stóð uppi sem sigurvegari á nýju glæsilegu íslandsmeti unglinga 327,5 kg.
Samanlagður árangur hans er 882,5 kg sem er 20 kg persónuleg bæting og nýtt met unglinga.
Við fögnum þessum frábæra árangri Júlíans og óskum honum til hamingju með góðar bætingar og enn eitt réttstöðugullið.
Íslensku unglingarnir hafa gert góða hluti á þessu móti undir stjórn þjálfara síns, Grétars Hrafnssonar. Við óskum liðinu og aðstoðarmönnum þeirra til hamingju með árangurinn, verðskuldað frí í kvöld og góða ferð heim.
Júlían Jóhannsson keppir á morgun á EM unglinga á Danmörku. Hann keppir í +120,0 flokki 19-23 ára karla.
Keppnin hefst kl. 10.00 á íslenskum tíma og verður í beinni útsendingu á netinu: http://goodlift.info/live.php
Óskum Júlían góðs gengis.