Fannar Gauti Dagbjartsson átti góðan dag á EM öldunga í kraftlyftingum, þegar hann vann til silfur- og bronsverðlauna í -120 flokki. Fannar sem keppir í öldungaflokki 40-49 ára fékk silfur í bekkpressu og brons í réttstöðulyftu og samanlögðum árangri. Í hnébeygju lyfti hann 302,5 kg sem er Íslandsmet, bæði í öldunga- og opnum flokki og í bekkpressunni lyfti hann 247,5 kg sem einnig er Íslandsmet. Þá lyfti hann 295 kg í réttstöðulyftu sem skilaði honum þriðja sætinu og þar með bronsinu. Samanlagður árangur hans 845 kg dugði Fannari til þriðja sætis í heildarkeppninni en sigurvegarinn var Zoltan Kanat sem lyfti 870 kg samanlagt. KRAFT óskar Fannari hjartanlega til hamingju með frábæran árangur.

Evrópumót öldunga í kraftlyftingum stendur nú yfir í Tékklandi og keppa tveir Íslendingar á mótinu. Á morgun laugardag keppir Fannar Dagbjartsson  -120,0 kg flokki karla 40-49 ára. Hann byrjar kl.09.00 á íslenskum tíma og er hægt að fylgjast með í beinni vefútsendingu hér: http://goodlift.info/live.php  Við óskum honum góðs gengis.

Halldór Eyþórsson (Breiðablik) lauk í dag keppni á Evrópumeistaramóti öldunga í kraftlyftingum, sem nú fer fram í borginni Pilsen í Tékklandi. Halldór hefur átt betri dag á keppnispallinum en náði samt að vinna til bronsverðlauna í hnébeygju og réttstöðu. Halldór fór í gegn með 250 kg í hnébeygjunni og reyndi tvisvar við 260 en fékk þær lyftur ekki gildar. Í bekkpressunni fór hins vegar að síga á ógæfuhliðina því þar náði hann engri gildri lyftu og féll þar með úr leik í keppninni um samanlagðan árangur. Halldór kom þó sterkur inn í réttstöðunni og vann þar til bronsverðlauna með 252,5 kg lyftu og gerði góða atlögu að silfrinu. Þótt takmarkið hjá keppendum sé alltaf að fá gildar lyftur í öllum greinum og samanlagðan árangur, þá er það engu að síður ánægjulegt að vinna til verðlauna fyrir stakar greinar og óskum við Halldóri til hamingju með bronsverðlaunin. Mótinu er hins vegar  ekki lokið og Fannar Dagbjartsson sem einnig er keppandi frá Breiðablik mun keppa á laugardaginn.