Monthly Archives: June 2011

Sunnumót_skráning

Posted on by
Reply

Sunnumótið í bekkpressu og réttstöðulyftu án útbúnaðar fer fram á Akureyri laugardaginn 16. júli. Mótið er eingöngu fyrir konur.
Allar kraftlyftingakonur eru hvattar til að taka þátt, en allar sem voru skráðar í sín félög fyrir 16.júni sl. hafa þátttökurétt á mótinu. Skráningarfrestur eru tvær vikur, eða til 2.júlí.
Félögin sjá um skráningu sinna keppenda og má senda  í tölvupósti á kfakureyri@gmail.com með afrit á kraft@kraft.is
Full nafn, kennitala, sími/netfang, félag og þyngdaflokkur keppandans þarf að koma fram.
Aðstoðarmenn þarf líka að skrá með nafni, kennitölu og félag.
Keppnisgjaldið er 2500,- krónur og skal greitt til KFA: Kennitala 631080-0309 – Reikningsnúmer: 0302-26-631080
Nánari upplýsingar um mótið verða birtar á heimasíðu KFA

EM öldunga

Posted on by
Reply

Evrópumót öldunga í kraftlyftingum fer fram í Tékklandi dagana 5. – 9. júlí nk. Tveir keppendur frá Íslandi taka þátt, þeir Fannar Dagbjartsson og Halldór Eyþórsson, báðir úr Breiðablik. Fannar keppir í 120,0 kg flokki karla 40-49 ára og Halldór í 83,0 kg flokki karla 50 – 59 ára. Þeir eru báðir reyndir keppendur og geta vel unnið til verðlauna á góðum degi, en við munum segja fréttir af gengi þeirra hér.
Heimasíða mótsins: http://www.powerlifting-czech.eu/

Sunnumót – skráning hafin

Posted on by
Reply

Það má segja að stelpurnar hafi stolið senunni á Kópavogsmótinu í bekkpressu sl laugardag. Fjöldi þeirra þótti í meira lagi fréttnæmur og tóku fréttamenn viðtöl við nokkrar konur sem kepptu á mótinu. Þær töluðu allar skýru máli um að kraftlyftingar er íþrótt sem hentar konum ekki síður en körlum.

Ármenningar hafa verið með áberandi sterkasta kvennaliðið fram að þessu en konum fer fjölgandi hjá öðrum liðum líka. Þó nokkuð er um að konur  úr ólíkum félögum æfi saman og hvetji hver aðra áfram.

María Guðsteinsdóttir hefur borið höfuð og herðar yfir öðrum kraftlyftingakonum undanfarin ár en verður að búa sig undir aukna samkeppni á næstunni. Það er hún einmitt að gera þessa dagana, en hún er í æfingarbúðum hjá Jörgen Bertelsen landsliðsþjálfara Dana staðráðin í að bæta sig enn frekar á komanda ári.

Næsta mót á mótaskrá Kraft er einmitt kvennamót, Sunnumótið, sem fer fram á Akureyri 16. júlí nk. í umsjá KFA.  Þetta er þriðja Sunnumótið, en mótið var upphaflega sett á laggirnar til heiðurs Sunnu Hlínar Gunnlaugsdóttur. Á mótinu er keppt í bekkpressu og réttstöðulyftu án útbúnaðar.  Í fyrra kepptu níu konur. Það verður gaman að sjá hvort keppendum fjölgi í ár.

Skráning á Sunnumótið er hafin. Mótið er að mótaskrá Kraft og gilda venjulegar reglur um þátttöku; keppendur þurfa að vera réttskráðar í félögum innan ÍSÍ og fara í öllu eftir reglugerðum Kraft. Nánari upplýsingar má finna á heimasíðu mótshaldara.

Góður árangur í drengjaflokki

Posted on by
Reply

Fjórir sterkir Massastrákar voru sérstakir gestakeppendur á opnu unglingamóti norska kraftlyftingasambandsins í Brumunddal í Noregi um helgina. Þeir hafa æft vel undir stjórn Sturlu Ólafssonar og náðu öllum sínum markmiðum á mótinu.
Þeir unnu til verðlauna, bættu sig allir glæsilega, settu mörg Íslandsmet í drengjaflokki og fengu vonandi hvatning og veganesti til áframhaldandi bætinga, en þeir eru augljóslega á réttri leið.

Daði Már Jónsson (-66,0 kg) lyfti 120-110-165=395 kg og lenti í öðru sæti í sínum flokki. Steinar Freyr Hafsteinsson (-74,0 kg) lyfti 150-110-200=460 kg og lenti líka í öðru sæti. Davíð Birgisson (-74,0 kg) lyfti 150-107,5-180=437,5 kg og varð þriðji. Ellert Björn Ómarsson (-83,0 kg) lyfti 125-80-170=375 kg og varð fimmti í sínum flokki. Daði, Davíð og Steinar bættu Íslandsmet í sínum flokkum og hér má sjá árangur þeirra nánar.
Hér eru heildarúrslit mótsins.

Þess má geta að tveir aðrir íslenskir strákar kepptu á mótinu, þeir Halldór og Guðsteinn Arnarsynir. Þeir kepptu fyrir Breiðablik á síðasta Íslandsmóti en mættu nú fyrir norska klúbbinn sinn Stavanger SK.

Í tengslum við mótið bauð Lars Samnöy, Þjálfari norska unglingalandsliðsins, upp á fræðslu og tækniþjálfun þar sem hann skoðaði stíl strákana og gaf góð ráð. Hann fékk landsliðsmennina Jörgen og Carl Yngvar með sér í liði til að sýna réttu hreyfingarnar.
Kraft þakkar norska sambandinu fyrir rausnarlegt heimboð og vonar að framhald verði á svona gagnlegu samstarfi.
Undirrituð var fararstjóri í ferðinni og get vottað að frammístaða og framkoma strákanna var þeim, félagi þeirra og íþróttinni til slíks sóma að eftir var tekið.


Jörgen, Carl Yngvar, Daði, Ellert, Davíð, Sturla, Lars og Steinar í æfingasal Brumunddal atletklubb.

Aron og Guðrún Gróa stigahæst á Kópavogsmótinu.

Posted on by
Reply

Kópavogsmótinu í bekkpressu lauk nú fyrir stundu og var mótið vel heppnað í alla staði. Áhorfendur fjölmenntu og hvöttu keppendur óspart, sem margir hverjir settu persónuleg met en einnig féllu Íslandsmet, bæði í unglinga- og opnum flokki. Í karlaflokki var stigahæstur Aron Lee Du Teitsson (Ármann) en hann setti Íslandsmet í -83 kg flokki karla þegar hann lyfti 185 kg í fyrstu tilraun og bætti svo metið aftur annarri tilraun með 195 kg lyftu. Hann átti einnig góða tilraun við 200 kg þótt ekki færi það alla leið í dag. Annar á stigum í karlaflokki var Sigurður Örn Jónsson (KFS Zetorar) en hann lyfti 145 kg í -83 kg flokki. Þriðji á stigum var svo Alexander Ingi Olsen (KFG Heiðrún) sem fór upp með 150 kg í -105 kg flokknum. Ekki var árangurinn síðri í kvennaflokkunum en alls mættu 10 vaskar konur á mótið. Guðrún Gróa (Ármann) setti unglingamet í -72 kg flokk með 90 kg lyftu og varð hún jafnframt stigahæst kvenna. Önnur stigahæst var Jóhanna Þórarinsdóttir sem keppti fyrir Breiðablik og munaði einungis 0,3 stigum á henni og Guðrúnu Gróu. Þriðja stigahæst var svo Fanney Hauksdóttir sem var að keppa á sínu fyrsta móti en hún setti íslandsmet í -57 kg unglingaflokki með 72,5 kg lyftu. Efnilega stúlka þar á ferð en hún keppti án útbúnaðar. Aðrir keppendur stóðu sig einnig vel en úrslitin má finna hér á vefsíðunni í úrslitadálknum.

Kópvogsmótið í bekkpressu

Posted on by
1

Þriðja Kópavogsmótið í bekkpressu fer fram í húsnæði Breiðabliks í Smáranum laugardaginn 18.júni. Mótið hefst kl. 14.00 en keppendur mæta í vigtun kl. 12.00. Ef einhverjir eiga eftir að greiða keppnisgjald verður að gera það strax. Annars er skráningin ekki gild.
Aðgangseyrir eru 500 krónur en frítt fyrir 12 ára og yngri. Veitingar verða til sölu á góðu verði.

Keppendur eru 18 að þessu sinni, og aldrei þessu vant eru konur í meirihluta. Það er ánægjuleg þróun að sífellt fleiri konur láta sér ekki nægja að æfa, heldur mæta líka í keppni og stefna markvisst á bætingar.
Gaman er að sjá Selfyssinga fjölmenna á þetta mót. Þau hafa fengið liðsstyrk þar sem Jóhanna Eivinsdóttir hefur gengið í félagið og verður áhugavert að sjá hana taka á því á bekknum eftir nokkurt hlé.
Meira er undir hjá sumum keppendum en öðrum, en meðal keppenda eru einstaklingar sem landsliðsnefndin hefur augun á. Það eru ekki mörg mót á næstunni, svo Kópavogsmótið getur skipt máli fyrir þá sem þurfa að sanna sig.

Við hvetjum alla áhugamenn um kraftlyftingar að fjölmenna í Smárann og hvetja sínar konur og menn. Þetta getur orðið spennandi keppni og skemmtilegt verður það örugglega því Blikar ætla að búa til góða umgjörð að vanda.

KEPPENDUR

KONUR

- 52,0: Hildur Sesselja Aðalsteinsdóttir – Ármann
- 57,0: Fanney Hauksdóttir – Ármann
- 63,0: Erla Kristín Árnadóttir – Ármann
- 72,0: Jóhanna Þórarinsdóttir  -  Breiðablik
- 72,0: Guðrún Gróa Þorsteinsdóttir – Ármann
- 72,0:  Hulda B Waage  -  Breiðablik
- 84,0:  Jóhanna Eivinsdóttir Christiansen  -  Selfoss
+84,0:  Lára Bogey Finnbogadóttir  -  Akranes
+ 84,0: Rósa Birgisdóttir  -  Selfoss
+ 84,0: Þóra Þorsteinsdóttir  -  Selfoss

KARLAR

- 66,0:  Sverrir Örn Gunnarsson  -  Selfoss
- 74,0: Emíl Hjaltason – Zetorar
- 83,0:  Sigurður Örn Jónsson  -  Zetorar
- 83,0: Aron Lee Duc Teitsson – Ármann
- 93,0: Kristján Sindri Nielsson – Breiðablik
- 93,0: Ingimundur Björgvinsson – Ármann
- 105,0:  Alexander Ingi Olsen  -  Garðabær
-120,0:  Daníel Geir Einarsson  -  Selfoss

EM unglinga lokið

Posted on by
Reply

Evrópumeistaramót unglinga lauk í dag í Northumberland á Englandi. Sett voru fjöldan allan af Evrópu- og heimsmetum á mótinu.
Íslensku strákarnir stóðu sig mjög vel og koma heima með tvenn silfurverðlaun. Viktor Samúelsson lyfti 260-195-280=735 kg og vann silfurverðlaun í flokki 105.0 kg drengja. Júlían J.K. Jóhannsson lyfti 290-190-302,5=782,5 kg og tók silfrið í drengjaflokki +120,0 kg. Auk þessu unnu þeir til verðlauna í einstökum greinum.
Viktor vann silfur í beygju og réttstöðu en gerði sér lítið fyrir og tók gullið á bekknum. Júlían sigraði bæði í bekk og réttstöðu í sínum flokki og vann silfrið í beygju. Flestar lyfturnar þeirra eru ný Íslandsmet bæði í drengja- og unglingaflokki, og réttstaða Viktors er líka nýtt met í opnum flokki.
Einar Örn Guðnason keppti í -93,0 kg flokki unglinga en átti ekki góðan dag. Hann lyfti 247,5 kg í beygju og 187,5 kg á bekknum en fékk ekki gilda réttstöðulyftu og datt úr keppni.
Liðsstjóri í ferðinni var Auðunn Jónsson. Helgi Hauksson dæmdi á mótinu.

Stigahæst í stúlknaflokki var Andrea Durand, Frakklandi, með 305,0 kg í -47,0 kg flokki: 411.140 stig.
Stigahæsta konan í unglingaflokki kvenna var Tutta Kristine Hanssen, Noregi, sem lyfti 520,0 kg í -63,0 kg flokki: 573.820 stig.
Stigahæstur í drengjaflokki var frakkinn Duong Vichet með 675,0 kg í -66,0 kg flokki, eða 531.022 stig.
Stigahæstur unglinga karla var norðmaðurinn Carl Yngvar Christensen sem lyfti 1080,0 kg í 120+ flokki unglinga og fékk 591.948 stig.

Rússar unnu stigaverðlaun liða í öllum flokkum, en í drengjaflokki finnum við Ísland í fjórða sæti, 3 fátæklegum stigum eftir Frakkland í þriðja sætið.

Hér má finna heildarúrslit

Einar Örn féll úr keppni

Posted on by
Reply

Einar Örn Guðnason hefur átt betri daga í keppni en á EM í dag. Hann keppti í -93,0 flokki unglinga, en náði ekki að ljúka keppni.

Einar átti erfitt strax í byrjun þar sem honum tókst ekki að klára byrjunarþyngd 247,5 kg  fyrr en í þriðju tilraun. Þetta er reyndar bæting hjá honum og hefði orðið nýtt Íslandsmet unglinga í flokknum. 
Á bekknum byrjaði hann í 187,5 kg og átti svo tvær ógildar tilraunir við 195,0 kg.
Í réttstöðunni varð þegar ljóst að ekki var allt með felldu þegar honum mistókst með byrjunarþyngdina 230,0 kg sem að öllu jöfnu á að vera auðvelt mál fyrir hann, og féll hann úr keppni.

Til að ljúka keppni á stórmóti þarf allt að vera í lagi, bæði líkamlega og andlega, og eitthvað brást hjá Einari í dag. Það eru míkil vonbrigði, en styrkur manna kemur líka í ljós í því hvernig þeir höndla mótlæti. Sumir gefast upp en aðrir eflast og við sendum Einari stuðningskveðjur og væntum þess að þetta fari í reynslubankann og honum gangi betur næst.

Sigurvegari í flokknum var Rússinn Evgeni Kuzmin með seríuna 380 – 240 – 302,5 = 922,5 kg

Landsliðið verður áfram á Englandi til að fylgjast með á lokadegi mótsins á morgun. Við óskum þeim góðrar skemmtunnar og góðrar ferðar heim.

Tvöfalt silfur á Evrópumóti unglinga í kraftlyftingum

Posted on by
Reply

Íslensku keppendurnir okkar, þeir Viktor Samúelsson (KFA) og Júlían J.K .Jóhannson (Ármann) stóðu sig frábærlega á sínu fyrsta Evrópumóti unglinga. Viktor tryggði sér silfur í -105 kg flokknum með seríuna 260 – 195 – 280 – 735 og setti nokkur íslandsmet, bæði í drengja- og unglingaflokki. Réttstöðulyftan hjá honum var jafnframt íslandsmet í opnum flokki. Árangur hans í bekkpressunni var mjög góður en hann var með þyngstu lyftuna af öllum í hópnum. Júlían nældi sér ennig silfur í +120 kg flokknum í hörkuspennandi keppni við Belgann Sebastien Dechamps, en missti naumlega af gullinu. Hann lyfti 290 – 190 – 302,5 – 782,5 og setti bæði drengja- og unglingamet í flokknum. Hann fór upp með 317,5 kg í seinustu réttstöðulyftunni en fékk lyftuna dæmda ógilda, en sú lyfta hefði tryggt honum gullið. Júlían hefur bætt sig mikið frá Íslandsmótinu í kraftlyftingum og sýndi enn og aftur að hann er í topp klassa. KRAFT óskar þeim félögum innilega til hamingju með frábæran árangur.