Góður árangur hjá Aroni

Posted on by

Aron Teitsson, Gróttu, lauk fyrir stundu keppni á HM í klassískum kraftlyftingum í Suzdal í Rússlandi. Hann vigtaði 82,35kg í -83,0 kg  flokki.
Ekki verður annað sagt en að Aron hafi staðið sig mjög vel á sínu fyrsta alþjóðamóti. Hann lyfti af miklu öryggi og fór í gegn með 8 lyftur gildar og endaði í 640 kg samanlagt sem dugði í 7.sætið.

Aron byrjaði mjög létt og örugglega með 210 og 220 í hnébeygju. Hann þurfti að berjast við 230 í þriðju og hafði sigur. Aron er sterkur í bekknum og lyfti þar 160 – 167,5 mjög örugglega og endaði í 4.sæti í greininni. 170 kg í þriðju tilraun reyndist of þungt.
Í réttstöðu lyfti hann 225 – 235 – 242,5 kg og fékk s.s. samtals 640,0 kg.
Sigurvegari í flokknum var rússinn Alexey Kuzmin með 760 kg.

Við óskum Aroni til hamingju með vel heppnað mót og góðan árangur!

Aron lyftir á morgun

Posted on by

531400_384831664886640_717329800_nAron Teitsson, Grótta, keppir á HM í klassískum kraftlyftingum á morgun, fimmtudag.
Aron keppir í -83,0 kg flokki og hefst keppnin kl. 11.30 að íslenskum tíma. Víð óskum Aroni góðs gengis á fyrsta alþjóðamóti hans!

Bein vefútsending: http://goodlift.info/live.php

Mótamál

Posted on by

Mótanefnd KRAFT hefur birt drög að mótaskrá fyrir 2014 og 2015.
Þar eru nokkrar breytingar frá því sem hefur verið undandfarin ár. Búið er að færa sum mót framar á dagatalinu og bætt hefur verið við Íslandsmeistarmót unglinga í klassískum kraftlyftingum í oktober. Íslandsmeistaramótið í mars verður áfram opið og aldurskipt eins og undanfarin ár.

Það er tímabært fyrir félög að byrja að hugsa um mótahald næsta árs. Mótshaldari vantar á öll stóru mótin og svo eru eflaust félög sem vilja fá sín mót á listann. Við viljum benda félögum á þann augsljósa ávinning sem er af því að sameinast um mótahald.

Beiðni um að koma mótum inn á skrá þarf að berast fyrir 1.september árið á undan. http://kraft.is/mot/motaskra/

 

HM í klassískum kraftlyftingum

Posted on by

Fyrsta heimsmeistaramót IPF í klassískum kraftlyftingum í opnum flokki og flokki unglinga  karla og kvenna hefst í Suzdal í Rússlandi á þriðjudag.
Sýnt verður frá mótinu á vefnum.

Fyrir hönd Íslands keppir Aron Teitsson, Gróttu. Hann keppir í -83,0 kg flokki á fimmtudag og er þetta fyrsta alþjóðamót sem Aron tekur þátt í. Honum til halds og trausts er Grétar Hrafnsson landsliðsþjálfari.
Við óskum Aroni góðs gengis.
Keppendalisti

Fréttir að vestan

Posted on by

Kraftlyftingafélagið Víkingur á Ísafirði efndi til keppnis milli félagsmanna sinna í bekkpressu og réttstöðulyftu  í gær. Ekki var um eiginlegt mót að ræða þar sem umgjörðin var of frjálsleg til þess, enda var markmiðið fyrst og fremst að gefa nýjum félögum smjörþefin af því hvernig er að lyfta á móti. 5 konur og 5 karlar tóku þátt, og lofar það góðu fyrir hið nýstofnaða félag.
Fréttir herma að ekkert var gefið eftir í lyftunum og væntanlega hafa menn fengið hvatningu til að taka upp æfingar af enn meira krafti.
Íslandsmeistaramótið í réttstöðulyftu fer fram á Ísafirði í september nk og þá ætla heimamenn væntanlega að láta til sín taka í alvöru.

Dómarapróf 7.september

Posted on by

Dómaranefnd KRAFT heldur réttindapróf fyrir kraftlyftingadómara 7.september nk. og komast 6 að í prófið.
Prófið verður auglýst nánar þegar nær dregur, en tekið er við óskum um þátttöku strax á kraft@kraft.is.
Í nýju mótareglunum eru gerðar auknar kröfur til félaga um að senda dómaramenntaða starfsmenn á mót og nauðsynlegt að fjölga dómurum í mörgum félögum. Ef aðsókn verður mikil munu þau félög hafa forgang sem ekki hafa dómara innan sinna raða í dag.

Að gefnu tilefni skal tekið fram að eingöngu próf á vegum dómaranefndar Kraftlyftingasambands Íslands gefa réttindi til að dæma á mótum KRAFT.

Ingimundur með nýtt Íslandsmet

Posted on by

Ingimundur Björgvinsson, Gróttu, keppti í dag á HM í bekkpressu. Hann vigtaði 103,3 kg í -105 kg flokki og endaði í 12. sæti í flokknum sem var fjölmennur og sterkur, og þurfti 300 kg til að ná 6.sætinu.

Ingimundur opnaði á nýju Íslandsmeti 250,0 kg. Hann reyndi síðan við 260 kg í næstu tilraun og svo 265 kg án árangurs og endaði þannig með 250,0 kg.
Ingimundur hafði ætlað sér stærri hluti, en það koma dagar eftir þennan dag.
Hann kemur heim með nýtt Íslandsmet og dýrmæta reynslu og við óskum honum til hamingju með það.

Eftir spennandi lokasprett sigraði Vitaliy Kireev frá Rússlandi með 312,5 kg á undan Petri Kuosma frá Finlandi og Mikael Lundin frá Svíþjóð.
http://goodlift.info/scoresheets/scoresheet_m.htm

Ingimundur lyftir á morgun

Posted on by

43Ingimundur Björgvinsson, Grótta, stígur á pallinn á HM í bekkpressu á morgun kl. 15.00 íslenskum tíma. Hann keppir í -105,0 kg opnum flokki. Það er fjölmennur flokkur og má búast við harðri og spennandi keppni.
Ingimundur er íslandsmeistari í flokknum og á íslandsmetið sem er 240,0 kg.
Þetta er fyrsta alþjóðamót Ingimundar og markmiðin eru skýr: að klára gildar lyftur og bæta íslandsmetið um 30 kg. Við óskum honum góðs gengis.
BEIN ÚTSENDING FRÁ MÓTINU.

Rífandi gangur á Akureyri

Posted on by

kfaMikil uppbygging hefur átt sér stað hjá Kraftlyftingafélagi Akureyrar undanfarið og nú hefur félagið flutt í nýja og glæsilega æfingaraðstöðu að Sunnuhlíð 12 eins og sjá má á facebooksíðu félagsins.
Skipulögð æfingartafla hefur tekið gildi og er lögð sérstök áhersla á að taka vel á móti ungum byrjendum sem fá þjálfun og aðstoð við hæfi af reyndum meðlimum félagsins.
Með þessu stendur félagið heldur betur undir nafnbótinni Fyrirmyndarfélag.

Við óskum norðanmönnum til hamingju með þetta góða starf. Verið er að kynna íþróttina okkar fyrir nýja kynslóð og er það framtak til eftirbreytni. Sterkir kraftlyftingafmenn hafa löngum komið frá Akureyri og hér stefnir allt í að svo verði áfram.

Nú er mál fyrir KFA-menn að mæta á staðinn og taka á því. Og fyrir meðlimi annara félaga að leggja leið sína norður í sumar og taka æfingu við fyrsta flokks aðstæður.